لكل البنات والعرايس الجداد _ دوره تعليم الطبخ واحده واحده لتعليم الأكلات الأساسية..!!
( الموضوع منقووووووووووول) مع تنسيقى
الدرس الاول
سلق اللحمه والفراخ
نبتدى يابنات مع اول حاجه هنتعلمها هى ازاى نسلق الفراخ و اللحمه ونعمل احلى شوربه نشربها
اولا : نغسل الفراخ كويس اوى بالملح والخل علشان الزفاره ونغسلهم كويس
ثانيا : بالنسبه للحمه نغسلها كويس
ثالثا : نحضر الحله ونحط فيها مايه ونحطها على البوتوجاز ونجيب بصله ونقشرها ونغسلها كويس ونحطها فى المايه ونحط عليها كمان فلفل وكمون وورق لورى وحبهان وشوربه فاين فودرز للبتحب تحطها لو مش عايزه تحطيها بلاش
ونسيب المايه تغلى بالبهارات دى كلها
اول ماتغلى المايه نحط فيها الفراخ او اللحمه واول ماتغلى تانى نهدى على النار ونسيبها تستوى
الفراخ
بنحط معاها الملح من الاول عادى بس ياريت نحطه شويه بشويه علشان نظبط الطعم والفراخ بتاخد حوالى ساعه الاربع سواء واول ماتستوى الفراخ بنشيلها من الشوربه علشان متتهريش فيها
اللحمه
بنحط عليها الملح بعد ماتكون قربت تستوى خلاص يعنى فى الاخر لان لو حطيته فى الاول اللحمه مش هتستوى واللحمه بتاخد حوالى ساعتين سواء
وبكده يابنات بنكون سوينا اهم حاجه زى اللحمه والفراخ ال لازم بتكون موجوده مع الاكل
الرز بأنواعـــــــــــــه
الرز بالخلطه
المكونات
2 كوب أرز مصري
½ كوب لوز محمص
½ كوب بندق محمص
¼ كوب زبيب منقوع
¼ كوب صنوبر محمر
3 كوب مرقة لحم
1 حبة بصل مفروم
2فص ثوم مفروم
قليل من القرفة
قليل من القرنفل
1 ملعقة صغيرة معجون صلصة طماطم
2 ملعقة كبيرة سكر
1 ملعقة كبيرة ماء
سمن حسب الحاجة
ملح وفلفل أسود حسب الرغبة
طريقة التحضير
في الحله يوضع السكر مع ملعقة من الماء ويسخن إلى أن يتحول السكر إلى اللون البني الداكن من دون أن يحترق
تضاف صلصة الطماطم والسمن والبصل والثوم ويترك لمدة 5 دقائق مع التقليب المستمر
تضاف القرفة والقرنفل والبهارات والملح والفلفل الأسود
يضاف الأرز ويقلب حتى تمتزج جميع المكونات معاً
تضاف المرقة وترفع درجة حرارة النار حتى يتشرب الأرز كمية المرق
تخفض درجة الحرارة على أقل درجة ممكنه حتى يتم نضج الأرز تماماً
في مقلاة يوضع ملعقة صغيرة من السمن ويحمر
بها المكسرات إلى أن تأخذ اللون الذهبي
يغرف الأرز في طبق مناسب ثم توضع المكسرات
أعلى الأرز ويضاف الزبيب أيضاً.
وممكن كمان تزويدى كبد وقوانص هتطلع حلوه اوى
وادعولى
دى الطريقه المعتمده فى الرز بالخلطه
++++++++++++++++++++++++++++++++++++
وفيه طريقه تانيه سهله للمش هتعرف تعمل الطريقه الاولى
هنجيب كميه من الكبد والقوانص ونقطعهم مكعبات صغيره ونشوحهم ببصله مفرومه والتوابل ونسيبهم يستووا
هنجيب حله ونحط فيها سمنه ونحمر الرز فيها لحد مايكون لونه بنى شويه مش محروق يعنى
ونحط عليه الشوربه ونسيبه يستوى
واول مايستوى نحط عليه الكبد والقوانص ونقلبهم
ولو بنحب المكسرات نجيب المكسرات ونشوحهم فى سمنه وبعدين نرشهم على وش الرز
ولو عايزين الرز يبقى لونه بنى ممكن نحطله شويه صغيرين من بهارات الكبسه هيبقى لونه بنى وممكن تضيفوا معلقه صلصه على الرز قبل مايستوى
دول طريقتين ال تحب تعمل اى طريقه براحتها الاتنين حلوين خالص
الدرس الثانى
كفته الفراخ
سهله اوى وكمان لذيذه جدا والاطفال والكبار بيحبوها وكتير مننا ميعرفوش الطريقه بتاعتها
بنجيب قطعه من الفراخ المسلوقه على حسب الكميه ال انتى عايزه تعمليها وبنفرمها فى الكبه
ونحط عليها بططسايه مسلوقه ونفرمها
وكمان بيضه نايه والبهارات وبرضو نفرمها
وبعد كده نحط شويه بقسماط شويه بشويه لحد ماتتماسك مع بعضها
وبعد ما تخلص ناخدها ونصبعها ونرشها بالبقسماط ونحطها على طبق
وبعدين نحمرها وبس كده
بتبقى تحفـــــــــه
بنعمل جمبها رز ابيض او مكرونه عاديه او مكرونه بالباشميل
+وممكن كمان نعمل كميه ونخزنها فى الفريزر لحد ما نحب نستعملها مش بيجرى ليها اى حاجه
التـــــــــــــوابل
كلنا بنروح محل العطاره بنبقى محتارين نجيب ايه ونستعمله فى ايه
وبنروح نشرى حاجات كتير مالهاش لزمه عندنا وبنصرف فيها فلوس وخلاص
+ المهم يبقى لازم نشترى الحاجات ال هنستعملها بس
ياترى زى ايه
الفلفل والكمون مهمين جدا ياريت نشتريهم حب ونطحنهم فى البيت بيبقوا تحفه
الكسبره الناشفه بتبقى حلوه اوى على الاكل
الكارى بنعمل بيه رز او فراخ او اى حاجه تانيه
الشطه وطبعا مهمه فى اى بيت
الورق اللورى بيتحط على الشوربه او الاكل زى الفراخ واللحمه وغيره
الحبهان طبعا مهم جدا مع الاكل
توابل الكبسه بتخلى رز الكبسه حلو اوى ولونه بنى
توابل اللحمه والفراخ بنستعملهم مع اللحمه والفراخ المشويين واحنا بنتبلهم
توابل الكفته حلوه اوى مع الكفته المشويه
القرفه بنستعملها على بعض الاكلات
الزعتر وطبعا بنستعمله مع الاكل والحاجات المشويه
دول يعتبروا اهم توابل بنستعملها فى البيت
وطبعا فيه توابل تانيه كتير بس بيبقى استعمالها اقل شويه
احنا نقدر نجيب دول والباقى لو احتجناه نبقى نجيبه
ياريت مش نجيب كتير علشان الحاجات مش تبوظ
الدرس الثالث
المكرونه
الدرس ده يابنات يعتبر للاساسيات وكمان ال بيعرفوا يطبخوا
طبعا المكرونه تعتبر مهمه جدا فى اكلاتنا وليها انواع كتير اوى
علشان كده انا حبيت اننا نتعلم اهم انواعها
المكرونه بالصلصه
طبعا بنسلق المكرونه اى نوع ونحطها على سبيكه الطماطم بالثوم ويتبقى طعمها حلو اوى
المكرونه بالباشميل
بنحضر الباشميل وهو عباره عن معلقتين دقيق نحمرهم فى سمنه ونحط عليهم كوبايه او كوبايه ونصف لبن ونقلبهم وكمان نحط كوبايه شوربه بتديها طعه خرافه وطبعا البهارات ونقلبه وياريت منسيبهوش يتقل يبقى حلو كده وسايب
نسلق المكرونه ونقلبها فى شويه من الباشميل
نكون معصجين اللحمه المفرومه ببصله مبشوره وتوابل ونسيبها تستوى على نار هاديه
نحط طبقه من المكرونه ثم طبقه اللحمه المفرومه ثم طبقه مكرونه ثم الباقى من الباشميل وتدخل الفرن على نار متوسطه
المكرونه النجرسكو
نحضر الباشميل زى ماقولنا قبل كده
نسلق المكرونه
نحضر الفراخ نجيب الفراج ونقطعها شرايح ونشوحها مع بصله مبشوره وتوابل ونسيبها تستوى
نجيب الصينيه ونحط المكرونه فى شويه من الباشميل ونقلبها ثم نعمل طبقه مكرونه ثم الفراخ ثم مكرونه ثم الباشميل وعلى الفرن على طول
المكرونه الطاجن بالصلصه
نحضر صلصه الطماطم بالثوم والتوابل وممكن شطه حمراء تنضرب فى الخلاط مع الطماطم ونسبهم يتسبكوا
نسلق المكرونه عادى خالص
نقلب المكرونه فى شويه من التسبيكه ونحطها فى صينيه وباقى التسبيكه عليها ونحطها فى الفرن
المكرونه المحمره
نجيب المكرونه ونحمرها فى حله فيها سمنه لحد ما تصفر
نزودها بالشوربه ونسيبها تغلى وقبل ماتشربها خالص نهدى عليها خالص لحد ماتستوى
وممكن نعملها شوربه مكرونه اننا نوزدها شوربه ونطفى عليها ويكون لسه فيه شوربه
دى تعتبر اهم انواع المكرونه ال بنعملها على السفره
ترتيب السفره
السفره كل ماتكون مترتبه ترتيب بسيط بيبقى شكلها حلو اوى
اهم حاجه اننا نزوق الاكل يعنى الاكل يكون شكله حلو مثلا الفراخ يبقى حواليها بطاطس شيبسى
البوفتيك مثلا يبقى حواليه خضار اخضر او شيبسى والسلطه يبقى شكلها جميل وهكذا
لازم كل واحد يبقى قدامه طبق وجنبه الملعقه والسكينه على اليمين والشوكه على الشمال
وكل واحد قدامه كوبايه فيها مايه وكوبايه فيها عصير او حاجه ساقعه لو تحبوا
لازم كل صنف من الاكل يبقى موجود فى طبقين طبق فى اول السفره وطبق فى اخر السفره علشان الكل يطول الحاجه
ممكن فى كل طبق نحط رز وشويه سلطه بشكل حلو بس برضو نحط رز تانى وسلطه تانى على السفره لليحب يعوز تانى
الحاجات الرئيسيه بتبقى فى الوسط يعنى مثلا ديك رومى فخده بط هكذا
ولو فراخ او لحمه نعمل طبقين برضو طبق فى الاول وطبق فى الاخر
كل واحد يبقى قدامه طبق الشوربه بتاعه وبرضو ممكن نزود شوربه على السفره لو تحبوا
متنسوش العيش يابنات يبقى موجود برضو فى طبقين متقطع ومظبوط كده
الملاحات مهمه جدا نحط اتنين واحده ملح والتانيه شطه مثلا لليحبها
الفوط بتاعت السفره تبقى موجوده جمب كل واحد ومفرش السفره يبقى حلو وممكن نحط فازه ورد فى النصف بس ياريت تكون قصيره علشان الكل يبقى مرتاح
دى تعتبر اهم ترتيب السفره
الدرس الرابع
البيتــــــــــــزا
بيتزا الجلاش
سهله اوى وجميله جدا والكبار والاطفال بيحبوها وكمان حلوه فى العزومات وتنفع للغداء والعشاء كمان
بيتزا الجلاش بالجبنه
اولا بنجيب لفه جلاش من السوبر ماركت
ونجيب صينيه مدهونه بسمنه بنفرد ورقه ورقه من الجلاش لحد مانوصل للنصف ونحشيها جبنه بيضاء وجبنه رومى وفلفل رومى مقطع وطماطم مقطعه وممكن اى نوع جبنه تانى كمان وزيتون مقطع
ونروح مكملين باقى الجلاش الطبقه التانيه يعنى
وبعد مانظبط الصينيه خالص نجيب بيضايه ونضربها بشويه لبن ونسقى بيها الوش ونقطعها وهى نايه مربعات كده
ونروح حطينها فى الفرن على درجه 180 لحد ماتستوى والوش يحمر
بيتزا الجلاش بالتونه
نفس الخطوات ال فوق لحد الحشوه بقى بنحط تونه وعليها فلفل مقطع وعليها طماطم مقطعه وزيتون مقطع واى نوع جبنه لو تحبوا ونروح مظبطين الصينيه بنفس الخطوات وعلى الفرن
بيتزا اللحمه المفرومه
نفس الخطوات بالظبط بس الحشوه بتكون لحمه مفرومه معصجينها ببصله مبشوره وتوابل ومستويه طبعا ومعاها طماطم مقطعه وفلفل مقطع وزيتون ونسويها بنفس الخطوات
بيتزا الجلاش بالفراخ
نفس الخطوات برضو بس الحشوه بتكون فراخ شرايح مستويه معاها التوابل ونقطع برضو طماطم وفلفل وزيتون ونسويها برضو
بيتزا بحشوات مختلفه
طبعا نفس الخطوات واى حشوه تحبوها مثلا سوسيس او سجق او بسطرمه او لانشون اى حاجه وطبعا بنقطع معاها فلفل وطماطم وزيتون ونحشى الجلاش
ليست هناك تعليقات:
إرسال تعليق